¤ Profport ¤

Boedelbeplanning (in Lewe) - die Profport-benadering

Waarom Boedelbeplanning?

‘n Buigbare boedelplan waar uself as boedeleienaar in beheer is, is van kardinale belang. U boedel behoort deurlopend beredderbaar te wees terwyl u nog lewe. Onder andere sal die volgende aspekte aandag moet kry:

1. UITSKAKELING VAN ONTWRIGTING EN FAMILIEKONFLIK
   ‘n Gestruktureerde boedelplan gedurende u leeftyd gee gemoedsrus en die absolute wete dat die minimum ruimte gelaat word vir onnodige ontwrigting, konflik en verwarring vir die langslewendes.



2. LIKIDITEIT
   U kan self gedurende u leeftyd en in die proses van boedelbeplanning besluit welke bates, soos onder andere die woonhuis, behoue moet bly ná u afsterwe.
   
   Strukturering vir die korrekte likiditeit en voorkoming van ‘n insolvente boedel verhoed dat van hierdie bates te gelde gemaak sal moet word tot verleentheid en nadeel van die langslewende erfgename.



3. VERSORGING VAN AFHANKLIKES
   Alleenlik boedelbeplanning kan bepaal of u afhanklikes nagelaat word met voldoende inflasie-verskanste inkomste, tesame met voorsiening vir addisionele kostes soos studiefooie vir die kinders, ens.



4. BELASTING
   Onnodige belasting, dit is inkomste-, boedelbelasting- en kapitaalwinsbelasting, kan u boedel verarm tot direkte nadeel van u erfgename. Instrumente soos familietrusts (inter vivos trusts) het meriete en word sterk gebruik met boedelbeplanning. Só kan belasting tot die minimum beperk word.



5. OORMAAT-LIKIDITEIT
   Die langslewende erfgename benodig vanaf dag een inkomste vir oorlewing. Swak beplanning of verouderde beplanning (of geen beplanning) veroorsaak dikwels dat te veel kontant opgesluit lê in ‘n afgestorwe boedel tot ná afhandeling van die bereddering, wat die erfgename erg kan benadeel. By die afwesigheid van kundige beplanning kan die afhandeling van ‘n gestorwe boedel soms jare duur.



6. VEREENVOUDIGING VAN DIE BEREDDERINGSPROSES
   Behoorlike en kundige boedelbeplanning lei tot ‘n maklike en vinnige boedelbereddering sonder haakplekke. Met boedelbeplanning word potensiële beredderingsprobleme reggestel terwyl u nog leef!



7. BESKERMING VAN SAKEBELANGE
   U praktyk en/of besighede is dikwels die “gans wat die goue eiers lê” en boedelbeplanning moet die beplanning vir die moontlike voortsetting daarvan of winsgewende afsluiting daarvan, insluit.



8. TESTAMENT
   
   • Alleenlik nadat die boedelbeplanning gefinaliseer is, is ‘n uitvoerbare testament moontlik.
   • Aanstelling van die korrekte eksekuteurs kan beplan word.
   
   
9. INTER VIVOS TRUST (“FAMILIETRUST”)
   9.1  "Nuwe" Trusts
   Boedelbeplanning met die gebruik van trust(s) het nog steeds meriete, met onder andere die volgende voordele:
   • Verskansing van bates;
   • Groei van bates in die trust wat toenemende boedelbelasbaarheid verhoed;
   • Kontinuïteit met die minste ontwrigting aan die langslewendes ten opsigte van bates reeds in die trust by u of u gade se afsterwe;
   • Beter beheer oor die boedel deur uself;
   • Vermindering van inkomstebelasting van die erfgename; en
   • Vermindering van u boedelbelasting en dié van u erfgename.
   9.2  Bestaande Trusts
   Bestaande trusts voldoen dikwels nie aan u behoeftes nie of vereis aanpassing by veranderde wetgewing en omstandighede. Kundigheid is ‘n noodwendigheid en PROFPORT is ook toegerus vir die oprigting van verpersoonlikte trusts, asook die wysiging of aanpassing van bestaande trusts.



10. BEHEER
    U moet steeds beheer behou oor die bates waarvoor u jare lank gewerk het. Die ideale boedelplan vervreem dus nie u bates en/of beheer daaroor nie.



11. BUIGBAARHEID
    Wetgewing en/of omstandighede verander gedurig. Aanpasbaarheid en buigbaarheid van ‘n boedelplan is dus belangrik om by hierdie veranderlikes aan te pas.